Mannauður 2017
Starfsmannastefna N1 endurspeglar þá staðreynd að einn mikilvægasti auður félagsins er fólginn í starfsfólkinu, þekkingu þess og færni.
Mannauður
Starfsmannastefna N1 endurspeglar þá staðreynd að einn mikilvægasti auður félagsins er fólginn í starfsfólkinu, þekkingu þess og færni. Stefna N1 er að laða að og halda í hæft og traust starfsfólk. Það er gert með því að skapa starfsfólkinu gott og hvetjandi starfsumhverfi efla það og styrkja með markvissri starfsþjálfun og þróun. Það er mikilvægt að starfsfólkið þekki hlutverk, stefnu og gildi félagsins, með því náum við betri árangri. Starfsmannastefna N1 er aðgengileg öllum starfsmönnum á Torginu, innrivef N1. Lykilferlar mannauðsmála voru teiknaðir upp og kynntir fyrir stjórnendum fyrirtækisins. Ferlarnir eru aðgengilegir öllum starfsmönnum í verkefnastjórnunarkerfi félagsins.
Jafnlaunavottun
N1 hlaut Jafnlaunavottun VR á kvenréttindadeginum, 19. júní 2015. Jafnlaunavottun VR er unnin eftir jafnlaunastaðli Staðlaráðs Íslands, ÍST85:2012. N1 er fyrsta íslenska olíufélagið sem hlýtur slíka vottun. Það skiptir miklu máli að allir sitji við sama borð þegar kemur að launaákvörðunum og mun jafnlaunakerfi tryggja að starfsfólki sem vinnur sömu eða jafnverðmæt störf sé ekki mismunað í launum. Niðurstöður úr jafnlaunaúttekt árið 2017 leiddu í ljós að kynbundinn launamunur er 4%. N1 er að rýna hækkun á milli ára, komið hefur í ljós mismunur í samsetningu launa sem verið er að leiðrétta.
Jafnréttisstefna
N1 hefur markað sér jafnréttisstefnu og er markmið hennar að stuðla að jafnri stöðu kvenna og karla og jöfnum tækifærum einstaklinga óháð kyni. Hver starfsmaður er metinn að verðleikum óháð kyni. Þannig er tryggt að mannauður fyrirtækisins nýtist sem best. Jafnframt er hvers kyns mismunun t.d. vegna kynþáttar, trúar- eða stjórnmálaskoðana, kynhneigðar, þjóðernis eða annars slíks óheimil. N1 hefur einnig markað stefnu og viðbragðsáætlun gegn einelti, áreitni og ofbeldi, en slík hegðun er undir engum kringumstæðum umborin á vinnustaðnum. Áhersla er lögð á að starfsmenn sýni samstarfsfólki sínu ávallt kurteisi og virðingu í samskiptum. Einelti er brot á starfsskyldum og óásættanleg hegðun á vinnustað. Stefnan er aðgengileg öllum starfsmönnum á innrivef fyrirtækisins.
Kjaramál og réttindi
Starfsmenn N1 eru með aðild að ýmsum stéttarfélögum og greiðir N1 öllum almennum starfsmönnum laun samkvæmt kjarasamningum þeirra. Á meðal stéttarfélaganna eru Efling, VR, SGS, FIT, Matvís og Byggiðn. Æðstu stjórnendur félagsins eru undanþegnir þessu. N1 fylgir lögum og reglum í landinu varðandi vinnuvernd, mannréttindi og barnaþrælkun og er stefna félagsins að ráða ekki starfsfólk undir 18 ára sé hjá því komist. N1 greiðir öll opinber gjöld og engin svört atvinnustarfsemi er í boði hjá félaginu.
Lögbundnar greiðslur N1 í lífeyrissjóði er að lágmarki 10% af öllum launum starfsmanns og greiðir starfsmaður 4%, N1 greiðir 2% á móti 2% framlagi starfsmanns í séreignarsjóð. Framkvæmdastjórar hafa kaupaukaákvæði í starfssamningi og starfsmenn þjónustustöðva sem eru í Eflingu hafa bónuskerfi í samræmi við kjarasamninga.
Uppsagnarfrestur er samkvæmt kjarasamningi stéttarfélags viðkomandi starfsmanns. Hann er misjafn eftir tegund ráðningar, starfs- og lífaldri. Uppsagnarfrestur er gagnkvæmur og allar uppsagnir skulu vera skriflegar. Meðalfjöldi starfsmanna sem fengu greidd laun á árinu var 707.
Starfsfólk
Áhersla er lögð á að jafna kynjahlutfall starfsmanna með því að fjölga konum í stjórnendastöðum og hvetja þær sérstaklega til að sækja um störf hjá félaginu sem gjarnan eru talin karllæg eins og störf í bílaþjónustu. Fjöldi starfsmanna í desember 2017 var 658, 256 konur og 402 karlar. Kynjahlutfall er óbreytt, 39% konur og 61% karlar.
N1 leitast við að ráða yfirmenn starfsstöðva á landsbyggðinni úr heimabyggð ef mögulegt er. Af 54 stjórnendum koma 53 úr heimabyggð eða 98% sem er sama hlutfall og á fyrra ári.
Starfsmannavelta hjá fyrirtækinu endurspeglar fjölbreytta starfsemi og aukið árstímabundið álag á þjónustustöðvum, í bílaþjónustu, verslunum og vöruhúsi. Heildarstarfsmannavelta fyrirtækisins er óbreytt á milli ára eða 30%. Starfsmannavelta er mest á útstöðvum, í bílaþjónustu, vöruhúsi og á þjónustustöðvum. Starfsmannavelta er minnst á skrifstofu. Árið 2017 voru stöðugildi hjá N1 að meðaltali um 545 á mánuði, árið 2016 voru þau 532.
Starfsfólk í stjórnendastöðum 2017
Breytingar urðu á stjórnendahópnum á árinu, fimm nýir kvenstjórnendur komu í hópinn sem er afar ánægjulegt. Mesta fjölgunin er í hópi stöðva- og verslunarstjóra. Konur í stjórnendastöðum árið 2017 voru 17, eða 31%, og karlar voru 37, eða 69%.
Fæðingarorlof 2017
Starfsmenn N1 sem unnið hafa hjá félaginu í 6 mánuði eða lengur eiga rétt á fæðingarorlofsgreiðslum úr fæðingarsjóði. Árið 2017 var fjöldi starfsmanna í fæðingarorlofi 20, 12 konur (meðalfjöldi fæðingarorlofsdaga 45) og 8 karlar (meðalfjöldi fæðingarorlofsdaga 28). Fimm konur snéru ekki til baka að orlofi loknu.
Helgun starfsfólks - starfsánægja
Framkvæmd var vinnustaðagreining í lok nóvember til að kanna stöðu innra starfs og hvernig starfsmenn upplifa vinnustaðinn, starfsumhverfið, álag, upplýsingamiðlun og aðra þætti sem snúa að innri ferlum fyrirtækisins. Vinnustaðagreiningin tekur mið af starfsánægju, starfsanda, markmiðum, streitu, vinnuaðstöðu, trausti til stjórnenda og yfirmanna, þekkingu á gildum og hvatningu. Gott starfsumhverfi leiðir til jákvæðs starfsanda þar sem frumkvæði og samheldni starfsfólks stuðlar að aukinni starfsánægju. Jafnframt telur N1 mikilvægt að vinnuaðstaða og tækjabúnaður sé eins og best verður á kosið. Hollusta starfsfólks er mæld með fjórum spurningum: heildaránægja, myndi mæla með N1 sem góðum vinnustað, stolt og mikilvægi starfs. Mælist hollustan nú 4,18. Niðurstöður sýna að starfsánægja minnkaði lítillega á milli ára og mælist nú 4,15 í stað 4,20 árið 2016. Niðurstöður vinnustaðagreiningar eru notaðar til að grípa til aðgerða sé úrbóta þörf í starfsumhverfinu.
Mælingar á innri þjónustu
N1 leggur áherslu á að veita starfsmönnum sínum kraftmikla þjónustu. Til að kanna upplifun starfsmanna á innri þjónustu fyrirtækisins var framkvæmd þjónustukönnun í fyrsta skipti hjá fyrirtækinu, á fjármála- og rekstrarsviði. Niðurstöður könnunarinnar eru notaðar til að bæta þjónustuna þar sem þess gerist þörf. Til stendur að kanna þjónustu fleiri sviða á næsta ári.
Heilsa
N1 er í samstarfi við Heilsuvernd sem sinnir skráningu á veikindum og slysum starfsfólks N1. Starfsfólk getur einnig leitað til Heilsuverndar og fengið ráðleggingar vegna veikinda sinna eða fjölskyldumeðlima, líkamsbeitingar eða annars konar heilsutengdra mála. Heilsuvernd heldur utan um veikindaskráningar og sendir N1 mánaðarlega skýrslur vegna þeirra.
Meðalfjöldi veikindadaga árið 2017 8,5 en voru 8,6 dagar árið 2016. Fjarverudagar vegna veikinda barna voru 318 talsins árið 2017 en voru 269 árið 2016.
N1 hvetur starfsfólk til heilsueflingar með ýmsum hætti m.a. með því að veita fastráðnum starfsmönnum líkamsræktarstyrk að upphæð 20.000 kr. árlega.
Öryggis- og heilsumánuður
Í febrúar ár hvert er öryggis- og heilsumánuður hjá N1. Þá er efst á baugi að efla öryggis- og heilsuvitund starfsmanna. Áhersla er lögð á öryggi í starfsumhverfinu og athygli vakin á heilbrigði og hreyfingu. Námskeið og fræðslufyrirlestrar tengdir skyndihjálp, eldvörnum, efnum og efnavörum, gæða-, umhverfis- og öryggismálum, ráni og rýrnun ásamt fyrirlestrum um heilsu og mataræði eru í brennidepli þennan mánuð. Starfsmenn eru hvattir til að taka þátt í Lífshlaupinu í febrúar, að hreyfa sig og taka þátt í skemmtilegum leik með vinnufélögum. Í febrúar árið 2017 sóttu 330 starfsmenn 23 námskeið tengd öryggi, heilsu og persónulegri færni á vegum N1 skólans.
N1 skólinn
Stefna N1 í fræðslumálum er að stuðla að nauðsynlegri starfsþjálfun og fræðslu starfsmanna. Félagið leggur mikla áherslu á fræðslu og starfsþróun við uppbyggingu öflugrar liðsheildar. Fræðsluþörf starfsmanna er metin árlega í starfsmanna- og frammistöðuviðtölum og vinnustaðagreiningu auk þess sem stjórnendur meta fræðsluþörf starfsmanna sinna. Fræðslan er síðan kortlögð með tilliti til heildarmarkmiða N1. Vel þjálfaður starfsmaður er betur í stakk búinn til að takast á við vinnu sína, laðar að sér viðskiptavini, eykur tryggð og býr yfir þekkingu og færni sem nýtist fyrirtækinu. Samhliða innri þjálfunaráætlunum styður félagið starfsmenn sem leita sér sí- og endurmenntunar utan vinnutíma að því marki sem hún tengist núverandi eða komandi viðfangsefnum á vegum N1. Þjálfun og fræðsla tekur mið af stefnu fyrirtækisins og þannig er tryggt að hún sé eins markviss og kostur er.
N1 starfrækir N1 skólann sem hefur það hlutverk að uppfylla fræðsluþarfir starfsmanna. Stefnan er að sem mest þjálfun og fræðsla fari fram innan fyrirtækisins og sé skipulögð af eða fyrir N1. Sé þess ekki kostur er leitað út fyrir N1 til þeirra aðila sem best henta hverju sinni. Grunnstoðir N1 skólans byggja á þjálfun og fræðslu um þjónustu, sölu, vöruþekkingu, verkferla, uppbyggingu og starfsemi N1, stjórnun og öryggis- og gæðamál.
N1 þarf að uppfylla fræðsluskyldur starfsmanna vegna ISO 14001 gæðavottunar, Michelin og Exxon Mobil vottunar og vegna sölu á vörum frá einstaka birgjum og er sú fræðsla skipulögð hjá N1 skólanum. N1 skólinn heldur reglulega fræðslufundi yfir vetrartímann, svokallaða föstudagsfundi og er markmiðið með þeim að miðla upplýsingum og fróðleik til starfsmanna, bæði til gagns og gamans. Að meðaltali eru 1-2 föstudagsfundir í mánuði, sumir fyrirlestranna eru teknir upp og gerðir aðgengilegir á Torginu, innrivef N1, þar sem allir starfsmenn geta nálgast þá.
N1 setti sér þjónustustefnu árið 2017 sem einkennist af gildum fyrirtækisins, virðingu, einfaldleika og krafti. Útbúnir voru þjónustustaðlar þar sem áherslan er á samræmd vinnubrögð og kraftmikla þjónustu. Móttaka og þjálfun nýliða hefur verið efld með því að byggja upp öflugt mentorakerfi þar sem reynslumiklir og velþjálfaðir starfsmenn taka á móti nýliðum, undirbúa og hjálpa þeim við að takast á við starf sitt með uppbyggjandi endurgjöf og hvatningu. Haustið 2017 hófust námskeið hjá N1 skólanum vegna Kraftmikillar þjónustu – hlutverk mentora við móttöku og þjálfun nýliða og voru haldin 11 námskeið fyrir stjórnendur og væntanlega mentora þjónustustöðva N1 um land allt.
Árið 2017 voru 55 námskeið haldin á vegum N1 skólans sem 630 starfsmenn sóttu og voru fræðslustundir samtals 1563. Framboð námskeiða hjá N1 skólanum getur verið ólíkt á milli ára þar sem áherslan er misjöfn hverju sinni. Starfsmenn eru duglegir að sækja fyrirlestra á vegum Dokkunnar, Stjórnvísi og annarra símenntunarfélaga en ekki er haldin skráning yfir þá fræðslu.
Öll fræðsla á vegum N1 skólans er starfsmönnum að kostnaðarlausu. Hverjum og einum er hins vegar frjálst að sækja önnur námskeið þar fyrir utan. N1 skólinn er grundvöllur þess að hægt sé að sinna þjálfun og endurmenntun starfsmanna á markvissan hátt og gera þá um leið að hæfari starfskröftum til framtíðar.
Starfsmannafélag N1 - SN1
Hjá starfsmannafélagi N1 er starfsmaður í hálfu starfi sem N1 kostar. Starfsmannafélagið er öflugt og stendur fyrir ýmsum viðburðum árlega. Starfsmenn geta fengið margskonar afþreyingu á niðurgreiddu verði svo sem leikhús- og bíómiða. Starfsmenn sem greiða gjald í starfsmannafélagið hafa afnot af orlofshúsum í eigu félagsins. Starfsemi SN1 miðar að því að auka starfsánægju og samheldni starfsmanna til eflingar liðsanda. Viðburðir á vegum SN1, N1 og N1 skólans eru auglýstir á Torginu, innrivef N1. Þar geta allir starfsmenn einnig nálgast upplýsingar um vinnuna, starfsmannatengt efni, fréttir úr starfseminni og fleira.
Torgið, innrivefur N1, er ein helsta upplýsingaveita fyrirtækisins og er aðgengilegur starfsmönnum hvar sem er. Allir starfsmenn geta sett skilaboð inn á vefinn, deilt fréttum, sett inn myndir, sótt upplýsingar um viðburði, stefnur, starfskjör, sótt um olofshús á vegum SN1 og margt fleira. Þar er einnig öflug fréttaveita. Vefurinn styttir boðleiðir, styrkir starfsandann og myndar betri liðsheild.
Laun framkvæmdastjórnar og árangurstengdar greiðslur
N1 hefur samið starfskjarastefnu í samræmi við þau skilyrði sem fram koma í 79. gr. a. laga nr. 2/1995 um hlutafélög. Markmiðið með stefnunni er að félagið sé samkeppnishæft og geti ráðið til sín framúrskarandi starfsfólk og stjórnendur. Til að svo megi verða er nauðsynlegt að stjórn félagsins sé kleift að bjóða samkeppnishæf laun og aðrar greiðslur sem tíðkast hjá sambærilegum fyrirtækjum.
Kaupaukakerfi framkvæmdastjórnar var kynnt þegar N1 var skráð á markað og eiga þeir sem eru í framkvæmdastjórn félagsins rétt á árangurstengdum greiðslum samkvæmt ákveðnum viðmiðum sem samþykkt eru af starfskjaranefnd félagsins. Viðmiðin eru annars vegar markmið sem forstjóri setur hverjum framkvæmdastjóra og eru markmiðin samþykkt af formanni starfskjaranefndar og hins vegar áætluð EBITDA félagsins á ársgrundvelli sem samþykkt er af stjórn félagsins.
Markmiðin sem framkvæmdastjórn eru sett vega 20% af árangurstengdum greiðslum á meðan EBITDA rekstrarárs í samanburði við áætlaða EBITDA rekstrarárs vegur 80%. Sé EBITDA á milli 95% - 110% af samþykktri áætlun geta framkvæmdastjórar átt rétt á árangurstengdum greiðslum sem nema eins til þriggja mánaða launum en forstjóri getur átt rétt á greiðslum sem nema allt að sex mánaða launum.
Árangurstengdar greiðslur eru greiddar út 1. mars eftir að almanaksári lýkur ef settum viðmiðum fyrir rekstrarárið á undan hefur verið náð sem er staðfest í endurskoðuðum ársreikningi félagsins. Árið 2016 var besta ár í rekstri félagins og voru árangurstengdar greiðslur til framkvæmdastjórnar í mars 2017 í hámarki og skýra þær hærri laun forstjóra og framkvæmdastjóra N1 að mestu leyti. Starfskjarastefna félagsins gerir jafnframt ráð fyrir því, að umbuna megi stjórnendum með veitingu kauprétta á hlutum í félaginu. Engir kaupréttir hafa þó verið og hvatakerfið því bundið við það form árangurstengingar sem að framan er lýst.
Laun og hlunnindi framkvæmdastjórnar greinast: