N1 sýnir ábyrgð í verki

N1 kolefnisjafnar, í gegnum Kolvið, beina losun frá starfseminni sem samsvarar 3.708 trjám. Er það  vegna CO2 losunar af notkun eigin bíla og flugferða starfsmanna í samræmi við undirritaðan samning frá 20. desember 2017.

N1 tekur á móti rafhlöðum og rafgeymum á öllum starfsstöðvum sínum og er þeim fargað sem spilliefnum. Þúsund lítra bambar eru endurnýttir eins og hægt er. Gerð var tilraun á stórri þjónustustöð með að láta viðskiptavini flokka sitt sorp en því miður þurfti frá að hverfa þar sem of mikil vinna fór í að endurflokka. Það er áskorun að reyna að fá viðskiptavini félagsins í lið með okkur að flokka sorp en hiklaust verður haldið áfram að reyna að finna lausnir til að gefa þeim færi á því.

Undanfarin ár hefur N1 markvisst unnið að því að draga úr notkun pappírs og einnota íláta innan félagsins. Einn af stærstu rekstrarvörubirgjum N1, Tork, framleiðir um 90% af sínum vörum undir vottuðum vistvænum merkjum. Salernispappír, handþurrkur og sápur sem er í noktun hjá N1 eru frá Tork. Á öllum starfsstöðvum N1 er lagt upp með að starfsmenn noti margnota drykkjarmál og eru þau útveguð starfsmönnum að kostnaðarlausu. MainManager er notaður m.a. til að halda utan um umkvörtunarefni frá viðskiptavinum, ábendingar úr starfseminni sem og vinnuslys. Innri úttektir eru einnig framkvæmdar í spjaldtölvu í gegnum sama kerfi. Verkefnastjórnunarkerfið Confluence einfaldar boðleiðir og upplýsingagjöf innan félagsins til muna auk þess sem útprentun minnkar.

Fjórða árið í röð er ársskýrsla N1 eingöngu gefin út á heimasíðu félagsins. Samfélagsmiðuðum innrivef er haldið úti til að auka aðgengi starfsmanna að upplýsingum hvort sem er heima við eða í vinnu og þar með sparast mikil útprentun á útstöðvum N1. Allir viðburðir á vegum N1, starfsmannafélagsins og N1 skólans eru auglýstir á innrivefnum. Notaðir eru skjáir á flestum starfsstöðvum til að koma upplýsingum til viðskiptavina og starfsmanna. Rafrænt kerfi var þróað til að halda utan um rekstrarhandbók, starfsleyfi og starfsemi N1 auk þess sem tilkynningar og ábendingar eru einnig rafrænar í gegnum heimasíðu og innrivef.

Viðskiptavinir N1 voru hvattir til að koma í rafræn viðskipti og útsendingum pappírsreikninga til einstaklinga hefur verið hætt, nema sérstaklega sé óskað eftir þeim. Einnig hefur N1 markvisst beint viðskiptum sínum um rafrænar reikningsleiðir þar sem því verður komið við. Unnið er að því með markvissum aðgerðum að auka rafræn viðskipti með það að markmiði að útrýma pappírsviðskiptum eins og hægt er.

Innleiðing „prentstöðva“ á starfsstöðvum N1 hófst í lok 2015. Prentstöðvar eru aðgangsstýrðar, stilltar til að prenta báðum megin á pappír og einungis í svörtu. Þannig þarf starfsmaður sjálfur að taka meðvitaða ákvörðun um að prenta í lit og öðru megin á síðu. Samhliða innleiðingu prentstöðva dróst notkun á ljósritunarpappír saman um 11% milli áranna 2016 og 2017. Það samsvarar 300.000 blöðum eða að hver starfsmaður N1 hafi minnkað útprentun um 449 blöð á árinu. Ljósritunarpappír N1 er vistvænn.

Árið 2015 byrjaði N1 að skipta út plastpokum fyrir maíspoka fyrir viðskiptavini þjónustustöðva og eru nú eingöngu maísburðarpokar til sölu á þeim en skrjáfplastpokar standa viðskiptavinum enn til boða endurgjaldslaust. Burðarpokar úr plasti eru eingöngu notaðir í verslunum N1 undir umfangsmeiri vörur þar sem maíspokar nýtast ekki. Innkaup N1 á plastburðarpokum hafa dregist saman um 6% og innkaup á maíspokum aukist um 26% milli áranna 2016 og 2017.

Frá árinu 2013 hefur N1 tekið þátt í Grænum apríl með því að efla umhverfisvitund innan fyrirtækisins og hafa ýmis átök verið gerð í flokkunar- og fræðslumálum í því samhengi. Fræðsla um flokkun hefur verið veitt  í samvinnu við Íslenska Gámafélagið en við höfum boðið starfsmönnum okkar í heimsóknir þangað til að fræðast um hvað verður um sorpið sem við flokkum hjá okkur. Markmiðið er að efla skilning starfsmanna á tilgangi flokkunar.

Starfsfólk á skrifstofu hefur verið fengið til að fara á stöðvar í hálfan dag til að hreinsa upp rusl eftir veturinn og dytta að utandyra, auk þess sem umhverfistengt fræðsluefni er á skjáhvílum til að efla umhverfisvitund starfsmanna.

Til að setja þessar tölur í skiljanlegt samhengi þá er rafmagnsnotkunin sambærileg við meðalnotkun 1.891 íslensks heimilis en meðalnotkun heimila er 5 megavattstundir á ári. Heitavatnsnotkunin jafnast á við notkun 305 heimila (meðalnotkun heimila er um 573 m3) og kaldavatnsnotkunin samsvarar því að fylla Sundhöll Reykjavíkur 238 sinnum. Það er álíka mikið kalt vatn og þarf til að laga  794 milljónir rjúkandi kaffibolla á næstu Nestisstöð. Óbein losun vegna raforkunotkunar árið 2017 var u.þ.b. 111 tonn af CO2.

N1 sækir vatn sitt í veitur hvers staðar fyrir sig nema í Staðarskála þar sem félagið er með eigin borholu. Í Vestmannaeyjum fylgir félagið í fótspor eyjarskeggja og sækir vatn til meginlandsins. N1 keppist við að endurnýta vatn þar sem því verður við komið. Affall húsa og tækja, svo sem kælitækja, er notað í snjóbræðslukerfi og á Eskifirði er affallsvatn frá sundlauginni nýtt til snjóbræðslu sjálfsafgreiðslustöðvar N1. N1 notar heitt vatn til kyndingar þar sem það er til staðar en annars rafmagnskyndingu. Í Staðarskála er ekki heitt vatn en þar er félagið með eigin borholu, þar er því mikil rafmagnsnotkun. Ráðgert er að á árunum 2018-2020 verði komið heitt vatn í þennan hluta Hrútafjarðar og verður þá skipt yfir í kyndingu með heitu vatni.

Gagnaöflun breyttist milli ára og fáum við frá og með þessu ári yfirlit yfir notkun frá Veitum, ON, Norðurorku, Orkusölunni, Orkubúi Vestfjarða, HS veitum og HS orku. Það er mjög jákvæð þróun og eflir áreiðanleika gagna. Áfram verður aflað gagna í gegnum reikninga frá smærri veitum.