Hlutdeildarfélög

Olíudreifing

Meginstarfsemi Olíudreifingar er dreifing og birgðahald á fljótandi eldsneyti fyrir eigendur fyrirtækisins, N1 og Olíuverzlun Íslands hf., og hefur Olíudreifing yfirtekið starfsemi móðurfélaganna á þessum sviðum.

Dreifing var fyrst yfirtekin í Reykjavík, Hafnarfirði og Hvalfirði árið 1996 en með tíð og tíma hefur starfsemin verið tekin yfir á hverjum staðnum á fætur öðrum á landsbyggðinni. Árið 1999 tók félagið við starfsemi móðurfélaganna á Ísafirði og þar með allri dreifingu á fljótandi eldsneyti fyrir utan Keflavíkur- og Reykjavíkurflugvelli.

Félagið rekur einnig bifreiða-, járnsmíða-, dælu- og rafmagnsverkstæði. Verkstæðin sjá um viðhald og uppbyggingu á eignum félagsins og á tæknibúnaði þjónustustöðva móðurfélaganna.

Starfsmenn félagsins eru 138 talsins á 15 starfsstöðvum víðsvegar um landið. Verktakar annast  dreifingu á þremur þessara starfsstöðva. Félagið á og rekur m.a. um 55 tankbíla, vörubíla og dráttarbíla auk um 50 smærri bíla. 16 birgðastöðvar félagsins eru með samtals 130 milljóna lítra geymarými og að auki á Olíudreifing 500 tonna afgreiðslubát. Félagið á auk þess umboðsverslunina G. Hannesson að fullu og 50% hlut í Icelandic Tank Storage sem á birgðastöðvarnar í Hvalfirði sem eru með 110 milljóna lítra birgðarými og sér auk þess um rekstur birgðastöðva í Helguvík og Fuel East á Keflavíkurflugvelli sem eru samtals með 121 milljón lítra geymarými.

Malik

Malik Supply A/S var stofnað 1989 sem sjálfstætt starfandi fyrirtæki í þjónustu við olíugeirann. Meginmarkmið félagsins er að útvega olíu, smurningsefni og aðrar vörur og þjónustu fyrir fiskveiðiflotann í Grænlandshafi og Norður-Atlantshafi. Malik A/S er í dag þjónustuaðili á fjölbreyttu sviði vöru og þjónustu. Auk fiskiskipa sinnir Malik einnig verslunar- og  flutningaflotanum. Malik sinnir verkefnum sínum bæði á sjó og við hafnir víðsvegar um heim.