Reglugerðir er varða starfsemi N1
Starfsemi N1 lýtur ýmsum opinberum reglugerðum og er að mestu leyti háð starfsleyfi. Starfsleyfi eru gefin út af hálfu heilbrigðiseftirlits viðkomandi sveitarfélags.
Það er öllum aðgengilegt að koma ábendingum til fyrirtækisins í gegnum heimasíðu N1, www.n1.is. Utanaðkomandi kvartanir eru skráðar í sérstakan gagnagrunn sem haldið er utan um og leyst úr hjá ábyrgðaraðila. Á hverju ári eru úttektir á starfsleyfisskyldri starfsemi N1 hjá heilbrigðiseftirliti viðkomandi sveitarfélags, úr þeim er unnið í samráði við viðkomandi heilbrigðiseftirlit.
Umhverfisóhapp varð í Grófarlæk í Fossvogsdal sem rakið var til starfsemi N1 að Stórahjalla í Kópavogi. Uppruni mengunarinnar var yfirfallsrör úr þró sem tengt var regnvatnslögn þar sem smurolía lak á milli. Yfirfallsrörið var óþekkt og ekki á teikningum en fannst við myndun lagna neðanjarðar. Það var grafið upp og lokað fyrir, skipt var um olíusorageymi og viðvörunarbúnaður yfirfarinn og efldur. Allar aðgerðir voru unnar í samvinnu við og með samþykki Heilbrigðiseftirlits Hafnarfjarðar- og Kópavogssvæðis. Í framhaldi fóru sérfræðingar N1 í gegnum allar teikningar og lagnir við olíusorageyma og mengunarvarnarbúnað smurstöðva N1, yfirfóru og betrumbættu leiðbeiningar fyrir hverja starfsstöð út frá eldri vinnulýsingu og efldu fræðslu.
N1 hefur eins og önnur fyrirtæki sem vinna með persónuupplýsingar hafið undirbúning fyrir hið nýja regluverk er varðar persónuverndarlöggjöf Evrópusambandsins. Í maí 2018 ætlar N1 að vera komið vel á veg í innleiðingu til að standast kröfur reglugerðarinnar varðandi vinnslu persónuupplýsinga og tryggja að unnið sé samkvæmt persónuverndarstefnu félagsins. Innleiðing reglugerðarinnar er eitt af umbótaverkefnum félagsins. Til að uppfylla kröfur um aukin réttindi einstaklingsins hafa vinnslur sem með einhverjum hætti varða persónuupplýsingar verið kortlagðar.
Þá hefur verið komið upp ferli til að tryggja aðgengi einstaklingsins að upplýsingunum sem og innleitt verklag sem snýr að tilkynningarskyldu til Persónuverndar ef upp koma öryggistilvik. En GDPR skapar ekki bara áskoranir heldur líka fjölmörg tækifæri. Nú þegar hefur fyrirtækið gripið til ákveðinna aðgerða sem snerta meðferð persónuupplýsinga starfsfólks og viðskiptavina og notfært sér undirbúningsvinnuna til að gera innri kerfi og ferla enn skilvirkari.
Umbótaverkefni í tengslum við að auka gæði gagna skapa tækifæri til að gera markaðsstarfið meira viðeigandi og einstaklingsmiðaðra. Einnig geta viðskiptavinir okkar treyst því að vinnsla með persónuupplýsingar sé gagnsæ og samkvæmt umboði hins skráða. Við erum þess vegna fullviss um að með því að standast kröfur reglugerðarinnar muni upplifun einstaklinga vera aukið virði í viðskiptum við N1.