Ávarp

Margrét Guðmundsdóttir stjórnarformaður og Eggert Þór Kristófersson forstjóri N1 hf.

Árið 2017 var gott ár í rekstri félagsins ekki síst vegna þess að framhald varð á aukningu ferðamanna til landsins þrátt fyrir minni vöxt en á síðustu árum. Mikil þróun hefur verið í innlendri verslun á síðustu misserum og tók félagið þátt í henni með kaupum á Festi hf. sem rekur meðal annars Krónuna og Elko, en nú er beðið eftir samþykki Samkeppniseftirlitsins. Eins og undanfarin ár var lögð áhersla á áframhaldandi hagræðingu á öllum sviðum en ljóst er að innlendar kostnaðarhækkanir eru orðnar miklar og þrýstingur á frekari kostnaðarhækkanir vofir yfir. Kaupin á Festi er stórt skref í þeirri vegferð að tryggja hagræðingu í rekstri.

Samfélagið

N1 hefur lagt ríka áherslu á samfélagslega ábyrgð og hefur sú afstaða félagsins endurspeglast í öllum rekstri þess og stuðningi við samfélagið sem við störfum í. Það var því mikill heiður og ánægja að N1 skyldi fá viðurkenningu Creditinfo, fyrst félaga á Íslandi, fyrir samfélagslega ábyrgð. Þetta er sérstaklega ánægjulegt fyrir þær sakir að starfsemi N1 er víðtæk og nær til alls landsins þar sem stór hluti bæði landsmanna og ferðamanna eru daglega í tengslum við félagið.

Á árinu undirritaði N1 samstarfssamning við Orku náttúrunnar um uppsetningu og þjónustu rafhleðslustöðva sem settar voru upp við þjónustustöðvar félagsins. Markmiðið með samningnum er að gera viðskiptavinum N1 kleift að ferðast hringinn í kringum landið á rafmagnsbílum og njóta í leiðinni veitinga á Nestisstöðvum N1. Samstarfið við ON á árinu var afar farsælt en um mitt árið gátu viðskiptavinir N1 hlaðið rafmagnsbíla sína á þjónustustöðvum milli Reykjavíkur og Akureyrar og áfram til Egilsstaða.

Enn á ný er N1 leiðandi á umhverfisvænum lausnum fyrir bifreiðaeigendur, enda fyrst olíufélaga til að hefja sölu á metani og innlendum biodísil en í áraraðir höfum við blandað bætiefnum í bæði dísil og bensín.

Samkvæmt umhverfisstaðlinum ISO 14001 og umhverfisstefnu N1 höfum við haldið áfram að votta þjónustustöðvar okkar. Alls nítján stöðvar hafa nú hlotið vottun og er stefna félagsins að allar þjónustustöðvar N1 fái ISO vottun. Sjónum hefur einnig verið beint að viðskiptavinum sem koma inn á stöðvarnar og áhersla lögð á að bæta gæði veitinga með hollustu í huga. Samstarf við íslenska bændur um markaðssetningu á lambakjöti og aukin áhersla á vegan valmöguleika eru liðir í þeirri þróun. Einnig er aðfangakeðja félagsins í sífelldri endurskoðun með tilliti til samfélagslegrar ábyrgðar og nær endurskoðunin til allra deilda.

Rekstur N1 gerir kröfu um að allt starfsfólk hafi sterka vitund um umhverfis- og öryggismál. Til að viðhalda þekkingu starfsmanna á þessu sviði hefur N1 haldið öryggismánuð í febrúar undanfarin sex ár. Þá eru uppfærðar neyðar- og viðbragðsáætlanir, einkum tengdar umhverfi og öryggi, ásamt rekstri og öryggi starfsfólks. Í öðrum stöðlum sem fyrirtækið uppfyllir, svo sem frá Michelin og ExxonMobil, er einnig lögð rík áhersla á umhverfismál og meðhöndlun úrgangs.

N1 er vel undirbúið undir ný lög um jafnlaunaúttektir. Félagið fékk jafnlaunavottun VR fyrst olíufélaga þann 19. júní 2015 á 100 ára afmæli kosningaréttar kvenna og hefur viðhaldið þeirri vottun allar götur síðan. Jafnlaunaúttektin greinir upplýsingar um raunverulegan launamun kynja og er það mikið ánægjuefni að geta sýnt fram á að N1 greiðir sömu laun fyrir sambærileg störf óháð kyni eða þjóðerni. Ánægja starfsfólks er okkur mikilvæg og árlega er gerð ítarleg ánægjukönnun meðal starfsmanna. Á þessu ári var niðurstaða hennar jákvæð miðað við árið á undan. Þriðja árið í röð vorum við kosin fyrirmyndarfyrirtæki af Creditinfo, sem er viðurkenning fyrir góðan og stöðugan rekstur.

Veigamikill þáttur í samfélagslegri ábyrgð N1 er að styrkja íþrótta- og æskulýðsstarf um land allt. N1 mótið hefur verið haldið á Akureyri í yfir 30 ár, en þar keppa strákar á aldrinum 11 til 12 ára í knattspyrnu og er þetta orðið stærsta mót sinnar tegundar á Íslandi. N1 er einn af bakhjörlum Knattspyrnusambands Íslands (KSÍ) en nýlega var endurnýjaður samstarfssamningur til þriggja ára. Meginefni samningsins er að halda áfram uppbyggingarstarfi íslenskrar knattspyrnu m.a. með því að standa á bak við Hæfileikamótun KSÍ þar sem við aðstoðum við að finna landsliðsmenn og landsliðskonur komandi kynslóða.

Nýja vörumerkið, Dælan, sem býður aðeins eitt lágt verð og engan afslátt, var kynnt á vormánuðum 2016 og hefur fest sig í sessi hjá þeim hópi viðskiptavina sem leggur mesta áherslu á lágt verð og enga þjónustu. Dælustöðvarnar eru þrjár talsins, í Mjódd, við Smáralind og í Fellsmúla.

Á árinu var ráðist í endurbætur á fjölmörgum þjónustustöðvum félagsins og fengu m.a. stöðvar N1 við Leiruna á Akureyri, Blönduósi og Bíldshöfða andlitslyftingu og eru nú hluti af Nestiskeðju N1. Að auki var ráðist í endurbyggingu söluskálans á Þórshöfn sem brann í janúar. Íbúar Þórshafnar voru afar ánægðir með þessa ákvörðun enda gegnir söluskálinn mörgum hlutverkum og er miðpunktur í daglegu félagslífi bæjarins.

N1 mótið hefur verið haldið á Akureyri í yfir 30 ár, en þar keppa strákar á aldrinum 11 til 12 ára í knattspyrnu og er þetta orðið stærsta mót sinnar tegundar á Íslandi.

Hluthafar

Aðalfundur N1 hf. var haldinn 21. mars. Á fundinum var samþykkt að greiða 750 m.kr. arð til hluthafa. Í stjórn voru kjörin þau Helgi Magnússon, Kristín Guðmundsdóttir, Margrét Guðmundsdóttir, Jón Sigurðsson og Þórarinn Viðar Þórarinsson. Á fyrsta stjórnarfundi eftir aðalfund var Margrét Guðmundsdóttir endurkjörin formaður stjórnar og Helgi Magnússon varaformaður. Á árinu störfuðu þrjár undirnefndir stjórnar, endurskoðunarnefnd, starfskjaranefnd og fjárfestingarráð. Endurskoðunarnefnd var skipuð Maríu Sólbergsdóttur endurskoðanda sem var formaður, en auk hennar sátu stjórnarmennirnir Kristín Guðmundsdóttir og Þórarinn V. Þórarinsson í nefndinni. Starfskjaranefnd var skipuð tveimur stjórnarmönnum, þeim Margréti Guðmundsdóttur, sem var formaður og Helga Magnússyni. Í Fjárfestingarráði sátu Jón Sigurðsson formaður og Eggert Þór Kristófersson.

Þann 16. febrúar 2017 var birt afkomuspá fyrir árið 2017 á þá leið að EBITDA ársins yrði á bilinu 3.400 - 3.500 m.kr. Sú spá var uppfærð í 3.500 - 3.600 m.kr. við kynningu á fyrsta árshlutauppgjöri sem birt var 26. apríl. Stór erlend verslun var opnuð í maí sem hafði mikil áhrif á smásölumarkaðinn á Íslandi og á sama tíma varð talsverð lækkun á olíuverði og styrking á íslensku krónunni gagnvart Bandaríkjadollar sem hafði neikvæð áhrif á afkomu N1 þannig að annar ársfjórðungur var undir væntingum okkar og markaðsaðila. En þrátt fyrir talsverða ágjöf varð niðurstaðan sú að EBITDA í ársreikningi félagsins varð 3.535 m.kr. og 3.605 m.kr. að teknu tilliti til kostnaðar við kaupin á Festi. Árið 2017 einkenndist á margan hátt af áframhaldandi hagræðingu í rekstri og var afkoma ársins rétt undir því sem hún var árið 2016 sem skilaði besta árangri félagsins frá stofnun.

Í lok árs 2017 er eiginfjárhlutfall 49,9% en markmið félagsins er að það verði 30 – 35% og mun það markmið nást með kaupunum á Festi.

Frá skráningu á markað árið 2013 hefur félagið greitt hluthöfum samtals 13.940 m.kr. í aðgreiðslur og lækkun hlutafjár. Markaðsvirði félagsins nam 28,5 milljörðum króna í árslok 2017 og var ávöxtun hluthafa 2017 neikvæð um 9%. Árleg ávöxtun frá skráningu hefur verið 31,7% að teknu tilliti til arðgreiðslu og lækkunar hlutafjár.

Kaup N1 á Festi

Þann 3. október 2017 var skrifað undir samning vegna kaupa N1 hf. á öllu hlutafé í Festi hf. Kaupsamningurinn byggir á viljayfirlýsingu sem N1 hf. og SF V slhf. skrifuðu undir þann 9. júní síðastliðinn um helstu skilmála viðskiptanna og niðurstöðu áreiðanleikakönnunar á Festi hf.

Festi sérhæfir sig í rekstri verslunarfyrirtækja og rekur 27 verslanir undir merkjum Krónunnar, ELKO, Nóatúns, Kjarvals og Kr, en félagið á einnig og rekur Bakkann vöruhótel. Festi á 18 fasteignir sem eru annaðhvort í leigu til verslana félagsins eða til þriðja aðila og er heildarstærð fasteignanna um 71.500 fermetrar. Heildarvelta Festi var rúmir 39 milljarðar króna á rekstrarárinu sem lauk 28. febrúar 2017.

Viðskiptin eru meðal annars háð skilyrðum um samþykki Samkeppniseftirlitsins. Þann 31. október 2017 skilaði félagið inn samrunaskrá til Samkeppniseftirlitsins sem hefur nú samkeppnisleg áhrif samrunans til rannsóknar. Niðurstöður Samkeppniseftirlitsins eru væntanlegar 18. apríl 2018. Gangi viðskiptin eftir er gert ráð fyrir að þeim ljúki í lok 2. ársfjórðungs 2018.

Til baka Lykiltölur